အရေးကြီး/ အရေးပေါ်၊ ကျန်းမာရေးနှင့် ပညာရေး ကိစ္စရပ်များဖြင့် ပြည်ပသို့ အချိန်မီ သွားရောက်ရန် လိုအပ်သူများအတွက် အထောက်အထားခိုင်လုံစွာဖြင့် နိုင်ငံကူးလက်မှတ် အမြန်ထုတ်ယူရရှိရန် Green Channel ဖြင့် စိစစ်ဆောင်ရွက်ပေးသွားမည်ဖြစ်ပါသည်။

၎င်းအပြင် MoU အလုပ်သမားများ၊ ဘာသာရေးဆိုင်ရာအဖွဲ့အစည်းများ၊ ယဉ်ကျေးမှုဖလှယ်ပွဲများ၊ သင်္ဘောသားများ၊ ပြည်ပသို့ ခွင့်ဖြင့်သွားရောက်မည့် ကိစ္စရပ်များ၊ ခရီးသွားလုပ်ငန်း ဖွံ့ဖြိုးတိုးတက်ရေးအတွက် ခရီးသွားအေဂျင်စီများ၊ ပညာသင်များ၊ သက်ဆိုင်ရာ ဝန်ကြီးဌာနအလိုက် အစိုးရကိစ္စရပ်များဖြင့် သွားရောက်မည့်သူများအနေဖြင့် အချက်အလက်ပြည့်စုံမှန်ကန်စွာဖြင့် တင်ပြလာမှုအပေါ် သက်ဆိုင်ရာဝန်ကြီးဌာနများ၏ ညွှန်ကြားရေးမှူးချုပ် အဆင့်နှင့်အထက် တာဝန်ရှိသူများမှ လက်မှတ်ရေးထိုးထောက်ခံပြီး ၎င်းဝန်ကြီးဌာနများမှတစ်ဆင့် ဥက္ကဋ္ဌ၊ မြန်မာနိုင်ငံကူးလက်မှတ်ထုတ်ပေးရေးအဖွဲ့ရုံးသို့ စာဖြင့်ကြိုတင်လျှောက်ထားပြီးပါက Green Channel အဖြစ် စိစစ်လက်ခံဆောင်ရွက်ပေးသွားမည် ဖြစ်ပါသည်။။

သို့ဖြစ်ပါ၍ Green Channel ဖြင့်‌ လျှောက်ထားလိုသူများသည် အောက်ဖော်ပြပါ လိပ်စာသို့ လိပ်မူ၍ ပေးပို့လျှောက်ထားနိုင်ပါသည်-

(က) လိပ်စာ        ဥက္ကဋ္ဌ၊ မြန်မာနိုင်ငံကူးလက်မှတ်ထုတ်ပေးရေးအဖွဲ့၊
            ရုံးအမှတ်(၃၈) ၊ နေပြည်တော်

(ခ) တယ်လီဖုန်းအမှတ်    0673411580 / 09882156633

မြန်မာနိုင်ငံသားများ ပြည်ပနိုင်ငံများသို့သွားရောက်နိုင်ရေးအတွက် နိုင်ငံကူးလက်မှတ်များလျှောက်ထားမှု အစဉ်ပြေချောမွေ့စေရန် မြန်မာနိုင်ငံကူးလက်မှတ် ထုတ်ပေးရေးအဖွဲ့မှ ဦးဆောင်၍ စီစဉ်ဆောင်ရွက် ပေးလျက်ရှိပါသည်။

မြန်မာနိုင်ငံကူးလက်မှတ်သည် မြန်မာနိုင်ငံသားဖြစ်မှု အထောက်အထားတစ်ခုဖြစ်ပြီး အရေးကြီးသော သက်သေခံအထောက်အထားတစ်ခုဖြစ်၍ မသက်ဆိုင်သော သူများလက်ထဲသို့ မရောက်ရှိရေးအတွက် ထိန်းသိမ်းစောင့်ရှောက်ရမည့်တာဝန်မှာ နိုင်ငံကူးလက်မှတ်ထုတ်ယူထားသည့် နိုင်ငံသားတိုင်း၏ အထူးတာဝန်ဖြစ်သော်လည်း လစဉ် နိုင်ငံကူးလက်မှတ်ပျောက်ဆုံး/ပျက်စီး၍ ပြန်လည်လျှောက်ထားသူ များပြားလျက်ရှိကြောင်း စိစစ်တွေ့ရှိရပါသည်။

မြန်မာနိုင်ငံကူးလက်မှတ် ပြည်တွင်း၌ပျောက်ဆုံးသူများ ပြန်လည်လျှောက်ထားမည်ဆိုပါက သက်ဆိုင်ရာရပ်ကွက်/ကျေးရွာအုပ်ချုပ်ရေးမှူး ထောက်ခံချက်၊ ပျောက်ဆုံးကြောင်း ရဲစခန်း ထောက်ခံချက်တို့ဖြင့် နိုင်ငံပိုင်သတင်းစာတစ်ခုခုတွင် နိုင်ငံကူးလက်မှတ်ပြန်လည်ရရှိနိုင်ရေးအတွက် အမည်၊ အဘအမည်၊ နိုင်ငံသား စိစစ်ရေး ကတ်အမှတ်၊ ပျောက်ဆုံးနိုင်ငံကူးလက်မှတ်အမှတ်တို့အား မှန်ကန်စွာ ထည့်သွင်းကြော်ငြာရမည်ဖြစ်ပါသည်။

၂၀၂၃ ခုနှစ်၊ ဇူလိုင်လ ၂၃ ရက်နေ့မှစတင်၍ သတင်းစာတွင်ကြော်ငြာပါရှိပြီး ၆ လ အကြာတွင် အဆိုပါသတင်းစာ(မူရင်း)နှင့်အတူ မြန်မာနိုင်ငံကူးလက်မှတ်ထုတ်ပေးရေးရုံးများသို့ သွားရောက်၍ ပြည်တွင်းတွင်အမှန်တကယ်ပျောက်ဆုံးကြောင်း ကိုယ်တိုင်ခံဝန်ကတိပြု လက်မှတ် ရေးထိုးခြင်း၊ စာအုပ်ဖိုးငွေ ၄၀,ဝဝဝ ကျပ်၊ ပျောက်ဆုံး/ပျက်စီး ဒဏ်ကြေးငွေ ၅၆,ဝဝဝ ကျပ်၊ စုစုပေါင်း ၉၆,ဝဝဝ ကျပ် ပေးဆောင်ခြင်းတို့ ပြုလုပ်ပြီး မြန်မာနိုင်ငံကူးလက်မှတ်အသစ် ပြန်လည်လျှောက်ထားရမည် ဖြစ်ပါသည်။

မြန်မာနိုင်ငံကူးလက်မှတ်စွန်းထင်းခြင်း၊ ရေစိုခြင်း၊ ရေးခြစ်ထားခြင်း စသည်တို့ကြောင့် မြန်မာနိုင်ငံကူးလက်မှတ်ပျက်စီးခြင်းဖြစ်ပွားပါက ပြည်ပသို့ ထွက်ခွာနိုင်ရေး ပြန်လည်လျှောက်ထားမည် ဆိုပါက ပျက်စီးသည့်စာအုပ်နှင့်အတူ စာအုပ်တန်ဖိုး ၄၀,ဝဝဝ ကျပ်၊ ပျက်စီးဒဏ်ကြေးငွေ ၅၆,ဝဝဝ ကျပ်၊ စုစုပေါင်း ၉၆,ဝဝဝ ကျပ် ပေးဆောင်၍ သက်ဆိုင်ရာ မြန်မာနိုင်ငံကူးလက်မှတ်ထုတ်ပေးရေးရုံး/ရုံးခွဲများတွင် လျှောက်ထားနိုင်ပါသည်။

ပြည်ပတွင်ရောက်ရှိနေသည့် မြန်မာနိုင်ငံသားများအနေဖြင့် ယင်းတို့၏ နိုင်ငံကူးလက်မှတ်ပျောက်ဆုံး/ပျက်စီးခြင်းများ ဖြစ်ပေါ်ပါက အောက်ပါ စာရွက်စာတမ်းများနှှင့်အတူ လူကိုယ်တိုင် သက်ဆိုင်ရာသံရုံးသို့သွားရောက်၍ စာအုပ်တန်ဖိုး အမေရိကန်ဒေါ်လာ ၃၅ ဒေါ်လာ၊ ပျောက်ဆုံးဒဏ်ကြေးအဖြစ် အမေရိကန်ဒေါ်လာ ၁၀၅ ဒေါ်လာ၊ စုစုပေါင်း အမေရိကန်ဒေါ်လာ ၁၄၀ ဒေါ်လာ နှင့် ညီမျှသည့် သက်ဆိုင်ရာနိုင်ငံများ၏ ငွေကြေးတန်ဖိုးအတိုင်းပေးသွင်း၍ နိုင်ငံကူးလက်မှတ်အသစ်အား ပြန်လည်လျှောက်ထား နိုင်ပါသည်-

• (က) နိုင်ငံသားစိစစ်ရေးကတ် မူရင်း/ မိတ္တူ
• ( ခ) အိမ်ထောင်စုစာရင်း မူရင်း/ မိတ္တူ
• ( ဂ) သက်တမ်းရှိအလုပ်သမား Work Permit (မှီခိုဖြစ်ပါက မှီခိုသူ ဇနီး/ ခင်ပွန်း/ မိဘ တို့၏ Work Permit နှင့် မိသားစုတစ်စုတည်း အိမ်ထောင်စုစာရင်း ဖြစ်ရမည် ဖြစ်ကြောင်း)
• (ဃ) ပျောက်ဆုံးနိုင်ငံကူးလက်မှတ်မိတ္တူ (မရှိပါက နိုင်ငံကူးလက်မှတ်အမှတ်)
• ( င) သက်ဆိုင်ရာနယ်မြေရဲစခန်း၏ ရဲစခန်းထောက်ခံစာ

ပြည်ပနိုင်ငံများတွင် နိုင်ငံကူးလက်မှတ်ပျောက်ဆုံးခဲ့ပြီး မြန်မာနိုင်ငံသို့ ပြန်လည်ဝင်ရောက်လာရာတွင် သက်ဆိုင်ရာလေဆိပ်/နယ်စပ် ဝင်/ထွက်ပေါက်များသို့ ရောက်ရှိပါက CI မူရင်းအား အပ်နှံရပြီး မိတ္တူကူးခြင်း (သို့မဟုတ်) ဓာတ်ပုံရိုက်ကူးခြင်းများပြုလုပ်၍ နိုင်ငံကူးလက်မှတ်အသစ် ပြန်လည်လျှောက်ထား လိုပါက မြန်မာနိုင်ငံကူးလက်မှတ်ထုတ်ပေးရေးရုံးများတွင် ပြည်ပပျောက်ဒဏ်ကြေး အမေရိကန်ဒေါ်လာ ၁၀၅ ဒေါ်လာ နှင့်ညီမျှသည့် မြန်မာငွေ (လက်ရှိ ဗဟိုဘဏ်၏ သတ်မှတ်နှုန်းထား)နှင့် စာအုပ်ဖိုးငွေ ၄၀,ဝဝဝ ကျပ် ပေးသွင်းပြီး ပြန်လည်လျှောက်ထားနိုင်ပါသည်။

မြန်မာနိုင်ငံကူးလက်မှတ် လာရောက်လျှောက်ထားသူများအနေဖြင့် မြန်မာနိုင်ငံကူးလက်မှတ်သည် မြန်မာနိုင်ငံသားဖြစ်မှု အထောက်အထားတစ်ခုအဖြစ် အရေးကြီးသော သက်သေခံအထောက်အထားတစ်ခုဖြစ်၍ မသက်ဆိုင်သောသူများလက်ထဲသို့ မရောက်ရှိရေးအတွက် မိမိတို့ကိုယ်တိုင်ထုတ်ယူထားသည့် မိမိတို့၏ နိုင်ငံကူးလက်မှတ်များအပေါ် အခြားသူများမှ အလွဲသုံးစားမပြုနိုင်ရေး ဂရုတစိုက်ကိုင်တွယ်ထိန်းသိမ်းသွားရန်ဖြစ်ပြီး ပျောက်ဆုံး၍ အသစ်ပြန်လည်လျှောက်ထားရာတွင် အချက်အလက်များလိမ်လည်ဖော်ပြခြင်းအား စိစစ်တွေ့ရှိရပါက ထိရောက်စွာအရေးယူဆောင်ရွက်သွားမည် ဖြစ်ပါသည်။

Green Channel သည် အရေးကြီး/ အရေးပေါ်ကိစ္စရပ်များဖြင့် ပြည်ပသို့ အချိန်မီ သွားရောက်ရန် လိုအပ်သူများအတွက် နိုင်ငံကူးလက်မှတ် အမြန်ထုတ်ယူရရှိရန် စီစဉ်ထားခြင်း ဖြစ်ပါသည်။

Green Channel ဖြင့် လျှောက်ထားရာတွင် MoU အလုပ်သမားများ၊ ဘာသာရေးဆိုင်ရာအဖွဲ့အစည်းများ၊ ယဉ်ကျေးမှုဖလှယ်ပွဲများ၊ သင်္ဘောသားများ၊ ပြည်ပသို့ ခွင့်ဖြင့်သွားရောက်မည့် ကိစ္စရပ်များ၊ ပြည်ပသို့ ဆေးကုသွားမည့်သူများ၊ ဆေးကုဖော် လိုက်ပါမည့်သူများ၊ ခရီးသွားလုပ်ငန်း ဖွံ့ဖြိုးတိုးတက်ရေးအတွက် ခရီးသွားအေဂျင်စီများ၊ ပညာသင်များ၊ သက်ဆိုင်ရာဝန်ကြီးဌာနအလိုက် အစိုးရကိစ္စရပ်များဖြင့် သွားရောက်မည့် သူများအနေဖြင့် အချက်အလက် ပြည့်စုံမှန်ကန်စွာဖြင့် တင်ပြလာမှုအပေါ် သက်ဆိုင်ရာ ဝန်ကြီးဌာနများ၏ ညွှန်ကြားရေးမှူးချုပ် အဆင့်နှင့်အထက် တာဝန်ရှိသူများမှ လက်မှတ်ရေးထိုး ထောက်ခံပြီး ၎င်းဝန်ကြီးဌာနများမှတဆင့် ဥက္ကဋ္ဌ၊ မြန်မာနိုင်ငံကူးလက်မှတ်ထုတ်ပေးရေး အဖွဲ့ရုံးသို့ စာဖြင့် ကြိုတင်လျှောက်ထားပြီးပါက Online Appointment ပြုလုပ်ခြင်းဖြင့် ရက်ချိန်းရယူရန် မလိုအပ်ဘဲ Green Channel အဖြစ် လက်ခံဆောင်ရွက်ပေးသွားမည် ဖြစ်ပါသည်။

ဥက္ကဋ္ဌရုံးသို့ ထောက်ခံတင်ပြပေးရမည့် ဝန်ကြီးဌာနများအနေဖြင့် မိမိသွားရောက်မည့် အကြောင်းအရာနှင့် ဆက်စပ်သည့် ဝန်ကြီးဌာနများဖြစ်ပြီး ဥပမာ- MoU အလုပ်သမားများအတွက် အလုပ်သမားဝန်ကြီးဌာန၊ ဘာသာရေးကိစ္စ/ သံဃာ/သီလရှင်များအတွက် သာသနာရေးနှင့်ယဉ်ကျေးမှု ဝန်ကြီးဌာန၊ သင်္ဘောသားများ/လေကြောင်းဝန်ထမ်းများအတွက် ပို့ဆောင်ရေးနှင့်ဆက်သွယ်ရေးဝန်ကြီးဌာန၊ ဆေးကု/ကျန်းမာရေးကိစ္စများအတွက် ကျန်းမာရေးဝန်ကြီးဌာန၊ ခရီးသွားလုပ်ငန်းများအတွက် ဟိုတယ်နှင့်ခရီးသွားလာရေးဝန်ကြီးဌာန၊ အစိုးရကိစ္စ/ ပညာသင်ကိစ္စများအတွက် လုပ်ငန်း ဆက်စပ်သည့် သက်ဆိုင်ရာဝန်ကြီးဌာနများမှ ညွှန်ကြားရေးမှူးချုပ်နှင့်အထက်အဆင့်များ ထောက်ခံပြီး ၎င်းဝန်ကြီးဌာနများမှတဆင့် ဥက္ကဋ္ဌ/အတွင်းရေးမှူး၊ မြန်မာနိုင်ငံကူးလက်မှတ်ထုတ်ပေးရေးရုံး(နေပြည်တော်) သို့ ရုံးစာဖြင့် ပေးပို့တင်ပြသွားရန် ဖြစ်ပါသည်။

ဥက္ကဋ္ဌရုံးမှ ယင်းထောက်ခံချက်နှင့်အတူ စိစစ်ခွင့်ပြုချက်များကို မြန်မာနိုင်ငံကူးလက်မှတ်ထုတ်ပေးရေးရုံး(ရန်ကုန်)သို့ ကြိုတင်စာရင်းပေးသွင်းထားမည် ဖြစ်ပါသည်။ Online Appointment စနစ်မှ ရုံးသို့လာရောက်ရမည့်ရက်ချိန်းကို ထုတ်ပေးမည်မဟုတ်ဘဲ ဥက္ကဋ္ဌရုံးမှ မြန်မာနိုင်ငံကူးလက်မှတ် ထုတ်ပေးရေးအဖွဲ့ရုံး(ရန်ကုန်)သို့ အမြန်ဆုံးစိစစ်ပေးပို့သွားမည်ဖြစ်၍ သက်ဆိုင်ရာမြန်မာနိုင်ငံကူးလက်မှတ်ထုတ်ပေးရေးရုံးနှင့် ဆက်သွယ်ဆောင်ရွက် သွားရန် ဖြစ်ပါသည်။ ထိုသို့ဆောင်ရွက်ရာတွင် အခက်အခဲရှိပါက ဥက္ကဋ္ဌရုံး၊ ဖုံးနံပါတ် ၀၉၈၈ ၂၁၅ ၆၆၃၃၊ ၀၆၇-၃၄၁ ၂၈၃၀၊ ၀၆၇-၃၄၁ ၂၈၃၀ သို့ ဆက်သွယ်မေးမြန်းနိုင်ပါသည်။